يعني ايه إدمان؟

يعني ايه ادمان؟

(1كو 6: 9- 12)

فيه تعريفات كتير للادمان لكن الحقيقة افضل تعريف هو "الاعتمادية".

الاعتمادية: هي اتكال الشخص او اعتماده على شيء ما لاشباعه وسعادته، مثل مادة كيميائية او هوس بالنجاح او العلاقات او السلطة.

لما سقط الانسان فقد سعادته لان الموت واللعنة بقوا بيلاحقوه، فتخيل انت شخص محكوم عليه بالموت وملعون، وكل حاجة في عيشته بقت صعبة، بقي تعيس جدا

فبدأ الانسان يدور على السعادة ومع انه انفصل عن المصدر الحقيقي للحياة وبالتالي السعادة الا انه أراد انه يبهج نفسه فبدأ يتكل على أمور أخرى تسعده، هو كأنه بيقول لله انت مش السعادة وانا هاوجد السعادة بنفسي وهكذا ظهر ما يعرف بالادمانات.

فيه ناس بتقول على الإدمان مرض ولكن الحقيقة الكتاب بيقول غير كدة، لأَنَّ زَمَانَ الْحَيَاةِ الَّذِي مَضَى يَكْفِينَا لِنَكُونَ قَدْ عَمِلْنَا إِرَادَةَ الأُمَمِ، سَالِكِينَ فِي الدَّعَارَةِ وَالشَّهَوَاتِ، وَإِدْمَانِ الْخَمْرِ، وَالْبَطَرِ، وَالْمُنَادَمَاتِ، وَعِبَادَةِ الأَوْثَانِ الْمُحَرَّمَةِ" (1بط4: 3) لان زي ما عرفنا الإدمان انه اعتمادية واتكالية على امر ما عشان تحصل على السعادة المرجوة.

الإدمان هو القيد اللي بيربطنا بالخطية – هو محبة الخطية وتبعيتها..وبالتالي ممكن نقول ان الإدمان هو طريق عبادة الاوثان انك تعمل وثن زي العلاقات مثلا وتكون هي مصدر فرحك وسعادتك واشباعك.

وبالتالي حياتك كلها بتتشكل بمجموعة الادمانات دي، يعني الموضوع مش مجرد سعادة لكن كمان انت بتتغير بحسب اللي بتتبعه في شبعك، اللي بيشبعك هو اللي بيشكلك.

والشيء اللي انت بتدمنه أيا كان مش هو سبب الإدمان..خالص.

لا سبب الإدمان هو قلبك اللي ماشي زي كلب جعان عايز أي حاجة تشبعه، فلو مفيش موبيل هيدور على كمبيوتر ولو مفيش هيدور على قنوات ولو مفيش هيدور على علاقات...مادة كيميائية..الخ.

بتشوف مدمن المخدرات؟؟ ممكن تعرف انه مدمن مخدرات بعد اد ايه من التعرف عليه؟؟ هتعرف صح؟؟ ليه؟؟ لان المخدرات اللي بتمتعه غيرت من طريقة تفكيره وبالتالي سلوكه وحياته.

فالوثن نهايته دمار وموت

لكن بولس الرسول بيقول لا، انتم اغتسلتم وتقدستم وتبررتم باسم الرب يسوع وبروح الهنا.

لو انت فاكر ان القداسة نكد او قمع تبقى مش فاهم يعني ايه قداسة.

- القداسة هي الرجوع لمعية الله تاني يعني اني اتحد بمصدر الحياة مرة أخرى ومن ثم بالفرح الحقيقي والسعادة المرجوة. جربت كام حاجة من الادمانات وكام حاجة اشبعتك؟

- القداسة هي ان يكون لي رجاء مهما ساءت الأحوال، هل العالم ليه رجاء بكل ادماناته؟؟

احنا عندنا المسيح رجاء الحياة الأبدية والقيامة من الموت اللي هو سبب تعاسة الانسان في الأساس.

المسيح حل مشكلة التعاسة الأساسية فلو انت مش في المسيح انت لسة محلتش المشكلة حتى لو عندك كل الادمانات.

- القداسة هي ان يكون ليا رسالة حقيقية بتغيرني لشبه المسيح وكمان ربنا يستخدمها انها تغير ناس تانية...دة اعظم وفرح وشبع للإنسان انه يحقق رسالة المسيح ويتلذذ بيها.

لا تعني القداسة الامتناع عن اللذة؛ بل تعني القداسة الإقرار بكون يسوع هو مصدر اللذة العظمى في الحياة.

عشان كدة لا يتسلط عليك شيء..استعمل الموبيل بس خليه لمجد الله وخدمة الرسالة

استعمل الانترنت والفيسبوك تويتر والواتساب بس لمجد الله

استعملهم ومتخليهمش يستعملوك (يستعبدوك) انت حر بالحرية اللي حررك بيها المسيح، انت فرحان بيه ومش محتاج أي شيء تاني يفرحك غيره.

القداسة هي اسهل طريق للسعادة زي ما قال سبرجن.

سبرجن: “إن القداسة هي أسهل طريق إلى السعادة. فإن موت الخطية هو حياة الفرح”.